Thursday, February 24, 2011

শৈশৱ, টিংকল আৰু পাই খুড়া

সন্ধিয়া কম্পিউটাৰত বহি কামত ব্যস্ত হৈ থাকোতে হঠাতে IBNLive এটা বাতৰিয়ে কম্পিউটাৰ স্ক্ৰীনত সংকেত দিলে। বাতৰিটো আছিল অমৰ চিত্ৰ কথা তথা টিংকলৰ জন্মদাতা অনন্ত পাই, যাক আমি পাই খুড়া' হিচাবে জানিছিলো, তেখেতৰ ৮১ বছৰ বয়সত দেহাৱসান ঘটিল মনটো সেমেকি উঠিল টিংকলৰ লগত শৈশৱ আমাৰ সম্বন্ধ সাধাৰণতে কেনেকুৱা সেয়া হয়তো সৰ্বজনবিদিত আমাৰ মাজৰ বেছিভাগেই যদি নিজৰ নিজৰ শৈশৱৰ পাতখিলা মেলি চাওঁ তেন্তে হয়তো বহুতো মিঠা স্মৃতি ভাঁহি আহিব অসমীয়া মাধ্যমত পঢ়া শুনাকৰা বাবে অসমীয়া টিংকল খন আছিল অতি প্ৰিয় স্কুলত থাকোতে লগৰ সমনীয়া বোৰৰ সৈতে টিংকলৰ খুবেই আদান প্ৰদান চলিছিল বিশেষকৈ সুপন্দি, চামটকা, কালিয়া, আনোৱাৰ, চিকাৰী শম্ভু, তন্ত্ৰী, মোল্লা নাছিৰুদ্দিন আদিৰ লগতেই যেন গোটেই শৈশৱটো কটাইছিলো। সুপন্দিৰ কাণ্ডবোৰ, চিকাৰী শম্ভুৰ ভাগ্যখন, তন্ত্ৰীৰ কু বুদ্ধিবোৰ, কালিয়াৰ টেঙৰামি আদিবোৰৰ মাজতেই ডুব গৈছিল শৈশৱ অমৰ চিত্ৰ কথা, টিংকল আদিৰে যিদৰে পাই খুড়াই এগৰাকী শিশুৰ শৈশৱ আচ্ছন্ন কৰি ৰাখিছিল সেয়া আছিল সঁচাকৈয়ে চমকপ্ৰদ কলেজ পোৱাৰ পাছতেই টিংকলৰ লগত সম্পৰ্কও কমি আহিল এতিয়াও টিংকল ওলাই আছে কিন্তু বহুত সলনি হ, হয়তো সময়ৰ আহ্বান কিন্তু সেই পুৰণি টিংকলবোৰৰ সুপন্দি, আনোৱাৰ, চামটকাহঁতৰ ছবি আজিও চকুৰ সন্মুখত হয়তো টিংকলক পাহৰিব নোৱাৰিম কেতিয়াও, যেনেদৰে পাহৰিব নোৱাৰিম পাই খুড়া

আজি পুৱা শুই উঠি ব্লগত টিংকলৰ ওপৰত এটা টোকা লিখাৰ পৰিকল্পনা কৰিছিলো। কিন্তু আবেলিলৈ টোকাটো লিখিবলগীয়া হল পাই খুড়াৰ মৃত্যুৰ বাতৰিৰে। সঁচাকৈয়ে অসহনীয়!

Monday, February 21, 2011

আন্তৰ্জাতিক মাতৃভাষা দিৱস আৰু কিছু অনুভৱ

প্ৰতি বছৰে ২১ ফেব্ৰুৱাৰী দিনটো আন্তৰ্জাতিক মাতৃভাষা দিৱস হিচাবে পালন কৰা হয়। বাংলাদেশৰ সেই বিখ্যাত ভাষা আন্দোলনৰ স্মৃতি জীয়াই ৰাখিবলৈ ৰাষ্ট্ৰসংঘৰ ইউনেস্কই মাতৃভাষাৰ ব্যাপক প্ৰসাৰৰ বাবে প্ৰতিবছৰে এই দিনটো আন্তৰ্জাতিক মাতৃভাষা দিৱস হিচাবে পালন কৰে।
১৯৪৮ চনত পাকিস্তান চৰকাৰে পূব পাকিস্তানত ৰাজকীয় ভাষা হিচবে উৰ্দুৰ প্ৰচলন ঘোষণা কৰাৰ পাছতে জাঙুৰ খাই উঠিছিল বাংলাভাষী পূব পাকিস্তানৰ নাগৰিক সকল আৰু জ্বলিছিল বিদ্ৰোহৰ অগনি, ঢাকা বিশ্ববিদ্যালয়ৰ কেইবাজনো ছাত্ৰ আৰক্ষীৰ গুলীত নিহত হোৱাৰ ফলত এই ভাষা আন্দোলনে ব্যাপক ৰূপ ধাৰণ কৰে। ফলত বাধ্য হৈ পাকিস্তান চৰকাৰে বাংলা ভাষাক চৰকাৰী ভাষা হিচাবে স্বীকৃতি দিবলৈ বাধ্য হৈ পৰে। এটা ভাষাৰ বিজয় এনেদৰেই হ’ল ব্যাপক জনজাগৰণৰ ফলস্বৰূপে।
অসমৰ ভাষা আন্দোলনো এই ক্ষেত্ৰত এক যুগান্তকাৰী ঘটনা। এতিয়া প্ৰশ্ন হয়, বাংলাদেশৰ ভাষা আন্দোলন আৰু অসমৰ ভাষা আন্দোলনৰ মাজত মুল পাৰ্থক্য ক’ত? বাংলাদেশৰ ভাষাপ্ৰেমে হয়তো অসমৰ ভাষাপ্ৰেমক চেৰাই গ’ল। সেই ভাষা আন্দোলনে বাংলা ভাষাৰ প্ৰতি থকা ভক্তি যেন দুগুনে জগাই তোলে। যাৰ ফল আজিও আমি দেখো। কিন্তু সম্পূৰ্ণ ওলোটা প্ৰতিচ্ছবি এখন আমি দেখা পালো অসমত। ভাষা আন্দোলনৰ সেই ত্যাগৰ যেন একো মূল্যই আমি দেখা নাপালো অসমত।
বৰ্তমান অসমত দেখা গৈছে মাতৃভাষাৰ ব্যাপক অনাদৰ। কাঠফুলাৰ দৰে গঢ় লৈ উঠা ইংৰাজী মাধ্যমৰ বিদ্যালয় সমূহেই হ’ল মাতৃভাষাৰ মূল শৰাধকাৰী। সেই বিদ্যালয় সমূহৰ শিক্ষা পদ্ধতি ইমানেই ইংৰাজী কেন্দ্ৰিক যে এদিন হয়তো এটি শিশুৱে নিজৰ মাতৃভাষাটো কবলৈও পাহৰি যাব। মাজে মাজে বাতৰি ওলায়, ইংৰাজী মাধ্যমৰ বিদ্যালয়ত শিশুৱে অসমীয়া ভাষাত কথা ক'লে শাস্তি বিহাৰ বাতৰি! ইয়াতকৈ দুৰ্ভাগ্যৰ কথা আৰু কি হ’ব পাৰে? এতিয়াও বহু বিদ্যালয়ৰ চৌহদত আনকি অভিভাৱক সকলকো অসমীয়া ভাষাত কথা ক’বলৈ দিয়া নহয়। যিটো এটা দেখ দেখ কৈ অপৰাধ। ইংৰাজী মাধ্যমৰ বিদ্যালয়ৰ শিক্ষা ব্যৱস্থা অসমত এতিয়াও কিছুমান ভুল ধাৰণাৰে পৰিচালিত। তেওঁলোকৰ মূলমন্ত্ৰই হ’ল, যদি ইংৰাজীত ‘ভাটৌ’ হ’ব বিচাৰা তেন্তে অসমীয়া ত্যাগ কৰা। য’ত ভোল যায় বহুতো অভিভাৱক আৰু যাৰ ফলত নিজৰ ল’ৰা ছোৱালীক ঘৰতো অসমীয়াত কথা বতৰা কোৱাত বাধা আৰোপ কৰে। কিন্তু অভিভাৱক সকলে এবাৰ ভাবি চাইচেনে যে বহুতো ছাত্ৰ ছাত্ৰী অসমীয়া মধ্যমৰ পৰা গৈ বিভিন্ন দিশত সুনাম আৰ্জিছে। এওঁলোকে ঘৰত নিজৰ মাতৃভাষাৰেই কথা পাতিছিল!
নি:সন্দেহে ইংৰাজী ভাষাটো বৰ্তমান যুগত এটা অতি প্ৰয়োজনীয় ভাষা, সেইবুলি নিজৰ মাতৃভাষাটো বাদ দি ইংৰাজীত পণ্ডিত হ’বলৈ যোৱাটো মুৰ্খৰ পৰিচায়ক। ইংৰাজী মাধ্যমত শিক্ষা লাভ কৰাটো কোনো কাৰণতেই বেয়া কথা হ’ব নোৱাৰে, কিন্তু ইংৰাজী শিকোৱাৰ নামত নিজৰ মাতৃভাষাৰ শৰাধ কৰাটোহে গৰিহণাৰ যোগ্য। শিক্ষক সকলতকৈও অভিভাৱক সকল এইক্ষেত্ৰত সচেতন হোৱাটো খুবেই জৰুৰী। অভিভাৱক সকলে নিজৰ শিশুক Orange মানে Orange বুলিয়ে শিকাওঁক, কিন্তু লগতে ইয়াৰ যে 'সুমথিৰা’ বুলি অসমীয়া নাম এটা আছে সেইটোও শিকাওঁক। ই কোনো অপৰাধ নহয় !!

Saturday, February 12, 2011

ধৰ্মীয় কাম কাজৰ এক অপৰিহাৰ্য্য অংগ : কঠ

নামঘৰ অথবা বিভিন্ন ধৰ্মীয় কাম কাজত বহিবলৈ ব্যৱহৃত বস্তুবিধেই হৈছে 'কঠ'। বিভিন্ন তৃণজাতীয় উদ্ভিদৰ মুঠাৰে তৈয়াৰী এইবিধ আসন বিভিন্ন ধৰ্মীয় কাম কাজত ব্যৱহৃত হয়, বিশেষকৈ বৈষ্ণৱ সমাজৰ সত্ৰ নামঘৰ আদিত ইয়াৰ প্ৰচলন সৰ্বাধিক। কঠৰ বাহিৰে অইন আসন সাধাৰণতে ব্যৱহাৰ কৰা নহয়। এই কঠৰ প্ৰচলন পোন প্ৰথম বাৰৰ বাবে মহাপুৰুষ শ্ৰীমাধৱদেৱে কৰা বুলি 'কথা গুৰুচৰিত' পুথিত উল্লেখ আছে। মাধৱদেৱে শুকান কলপাতৰ থোৰাৰ সহায়ত ভকত সকলৰ বহা আসন তৈয়াৰ কৰি শ্ৰীমন্ত শংকৰদেৱৰ সন্মুখত প্ৰদৰ্শন কৰিছিল, যাৰ নাম মাধৱদেৱে ৰাখিছিল 'কট' হিচাবে। সাধাৰণতে কলগছৰ শুকান পাতৰ থোৰ, কুঁহিলা আদিৰ সহায়ত কঠ প্ৰস্তুত কৰা হয়। বাৰিষা কালত পানীত সেমেকি থকা অঞ্চলৰ পৰা কোমল আৰু সোপোকা কুঁহিলা সংগ্ৰহ কৰি সেইবোৰ জোখমতে কাটি পাচত শালত কঠ তৈয়াৰ কৰা হয়। নগাওঁ জিলাৰ বটদ্রৱা অঞ্চলত কুঁহিলাৰ সহায়ত কঠ নিৰ্মান এক উদ্যোগ হিচাবে জনাজাত।

Tuesday, February 8, 2011

লেণ্ডলাইনৰো এটা 'জামানা' আছিল!

“হেল্ল’ এইটো ৰাজেন বৰাৰ ঘৰ হয়নে?”
“হয়, আপুনি কোনে কৈছিলে বাৰু?”
“মই গুৱাহাটীৰ পৰা হোমেন বৰুৱাই কৈছিলো, আচলতে আপোনালোকৰ ওচৰ চুবুৰীয়া ভদ্ৰ হাজৰিকাক অলপ লাগিছিল। মাতি দিব পাৰিব নেকি বাৰু?”
“ঠিক আছে মাতি দিছো। আপুনি পোন্ধৰ মিনিটৰ পাছত ফোন কৰক।”
“অই বাবু, যাছোন ভদ্ৰ খুড়াক মাতি আন, ফোন অহা বুলি কগৈ।“
“বাৰু”(মুখ বিকটাই)

পোন্ধৰ মিনিট পাছত ক্ৰিং ক্ৰিং ক্ৰিং ক্ৰিং

“অ’ তেখেত আহি পোৱা নাই, মানে তেওঁৰ ঘৰ সিটো মূৰত যে, আহিবলৈ অলপ সময় লাগে। তাতে আকৌ তেওঁলোকৰ লগত কাষৰীয়া শইকীয়াহঁতৰ ভাল নহয় যে, সেইকাৰণে আমাৰ নম্বৰটোকে দি থৈছে(অলপ বেছিয়েই হ’ল)। আপুনি ২০ মিনিট পাছত ফোন কৰকছোন।“ 

প্ৰথম ফোনৰ সম্পুৰ্ণ আধা ঘণ্টাৰ পাছত ভদ্ৰ খুড়াৰ পদাৰ্পন। ফোন আহিব আহিব বুলি বহি আছে, বৰশী বাই।

“লওঁক চাহ একাপ”
“এহ চাহ নোহোৱা হ’লেও হ’ল হয়। মিছাতেই কষ্টখন হ’ল”
আৰু আধা ঘন্টা মানৰ পাছ্ত হোমেন বৰুৱাৰ ফোন
“অ শইকীয়া, কাইলৈ আহোতে লগতে ফাইলটো লৈ আহিব”
“ঠিক আছে বাৰু। আৰু কিবা?”
“অ’ আৰু এটা কথা, আপোনাৰ একেবাৰে ওচৰৰ কাৰোবাৰ ঘৰত ফোন নাইনে কাৰো? বহুত সময় ৰখিবলগীয়া হ’ল। পাৰিলে আপোনালোকৰ কাষৰীয়া শইকীয়াৰ লগত সম্বন্ধটো ভাল কৰক হে।”

Wednesday, February 2, 2011

ইন্টাৰনেটত অ আ ক খ


(বনজীৎ পাঠকৰ সৈতে) 

     কেইবছৰ মান আগলৈকে আছিল মাথোঁ এক কল্পনা, যিটো এতিয়া এক দিঠক! হয়, বৰ্তমানৰ চ্চ কাৰিকৰী প্ৰযুক্তিবিদ্যাৰ ফলতেই সম্ভৱ হৈ উঠিছে কম্পিউটাৰত আমাৰ চিৰ চেনেহী অসমীয়া ভাষাৰ জিলিকনি
     বৰ্তমানৰ যুগটোৱেই হৈছে ইন্টাৰনেটৰ যুগ। কিছুদিনৰ আগলৈকে ইন্টাৰনেটত যদিও কেৱল মাত্র ইংৰাজী ভাষাটোকেই প্রাধান্য দিয়া হৈছিল, কিন্তু বৰ্তমান সময় লগে লগে সলনি বলৈ ধৰিলে ভাষাৰ ৰূপ ইন্টাৰনেটত লাহে লাহে জিলিকি উঠিবলৈ ধৰিলে বিশ্বৰ বিভিন্ন প্ৰান্তৰ ভাষাসমূহ। ইন্টাৰনেটক জনসাধাৰণৰ মাজত ব্যাপক ৰূপত প্রসাৰ ঘটাবলৈ আৰম্ভ হবলৈ ধৰিলে বিভিন্ন আঞ্চলিক ভাষাসমূহৰ সংযোজন। বিশ্বৰ বিভিন্ন প্রান্তৰ ভাষাৰ লগতে বৰ্তমান ইন্টাৰনেট চানি ধৰি আছে ভাৰতৰ বিভিন্ন প্রান্তৰ আঞ্চলিক ভাষাসমূহ। ইয়াৰ ভিতৰত তামিল, তেলেগু, বাংলা, গুজৰাটী, মালায়ালাম আদিবোৰেই প্রধান। নিতৌ পৰীক্ষাৰে এই ভাষা সমূহৰ ব্যাপক প্রয়োগ ঘটিবলৈ আৰম্ভ হৈছে। কিন্তু অতি দুখ লগাকৈ পিছ পৰি আছে ভাৰতৰ ভিতৰত মুখ্য ভাষা হিচাপে পৰিচিত আমাৰ অসমীয়া ভাষাটো। হয়তো আমাৰ এলাগী মনোভাব,অমনোযোগিতা বা প্রয়োগৰ অসুবিধাৰ বাবেই এতিয়াও ভালেখিনি পিছপৰি আছে। এতিয়াও কম্পিউটাৰত অসমীয়া ভাষাৰ প্রয়োগৰ প্রযুক্তিগত দিশ সিমানখিনি উন্নত হোৱা নাই। কিন্তু বৰ্তমানৰ বিকশিত প্ৰযুক্তিবিদ্যাৰ যুগত আমি আমাৰ অসমীয়া ভাষাটো পিছ পেলাই থম জানো? নিশ্চয় নহয়।
     ইন্টাৰনেটৰ প্ৰসাৰৰ লগে লগে ইংৰাজী ভাষাৰ বাহিৰেও বিশ্বৰ প্ৰায় সকলো দেশৰ নিজ নিজ ভাষাৰ ৱেব্চাইট সমূহো ইন্টাৰনেটত বৃদ্ধি পাইছে। ইংৰাজী ভাষাৰ ৱেবছাইটসমূহৰ তুলনাত অন্য ভাষাৰ ৱেবছাইটৰ সংখ্যা কম যদিও সম্প্ৰতি আঞ্চলিক ভাষাৰ সমূহৰ ৱেবছাইটৰ সংখ্যা ক্ৰমাগত বৃদ্ধি পাবলৈ ধৰিছে। ইন্টাৰনেটতে হওঁক অথবা আপোনাৰ কম্পিউটাৰটোতে হওঁক আঞ্চলিক ভাষাৰ আখৰ লিখাত কিছু কাৰিকৰী অসুবিধা আছিল কিন্তু এই অসুবিধা সমূহ আঁতৰ কৰিবলৈ ১৯৯১ চনত Unicode Consortium নামৰ অপেছাদাৰী সংগঠনটোৱে ইউনিকোড (UNICODE) নামৰ এটা প্ৰণালী উদ্ভৱন কৰে, যি প্ৰণালীয়ে বৰ্তমান ইন্টাৰনেটত আঞ্চলিক ভাষা সমূহৰ প্ৰয়োগৰ ক্ষেত্রত এক যুগান্তকাৰী ঘটনাৰ সূচনা কৰিছে।
"Unicode provides a unique number for every character, no matter what the platform, no matter what the program, no matter what the language -- source unicode.org"

ইন্টাৰনেটত অসমীয়া ভাষা ব্যৱহাৰ কৰিব কেনেদৰে?
     ইউনিকোড প্ৰণালীৰ সহায়ত বৰ্তমান সহজে কম্পিউটাৰত অসমীয়া ভাষাটো পঢ়িব তথা লিখিব পৰা যায়। কিন্তু আমাৰ কাৰিকৰী জ্ঞানৰ অভাৱতেই হওঁক অথবা সজাগতাৰ বাবেই হওঁক্,ইয়াৰ প্ৰয়োগ কম হোৱা দেখা গৈছে। কিন্তু ইয়াৰ বাবে বিশেষ কোনো কাৰিকৰী জ্ঞানৰো সিমান প্ৰয়োজন নাই। সৰু সুৰা কিছুমান খুঁটি নাটি মাৰি লে আপোনাৰ কম্পিউটাৰটোও অসমীয়া ভাষাৰ বাবে সাজু হৈ উঠিব পাৰে। আপোনৰ কম্পিউটাৰত যদি কেতিয়াবা আখৰবোৰ আয়তাকাৰ বাকচ অথবা যথেষ্ট সৰু আকৃতিত দেখে তেন্তে বুজিব লাগিব সেই আখৰ সমূহ ইউনিকোড প্ৰণালীৰ আখৰ ইউনিকোড যুক্ত কিছুমান বিশেষ ফন্ট(Font) অপোনাৰ কম্পিউটাৰত স্থাপন কৰি সেই আয়তাকাৰ আখৰ সমূহ সুন্দৰ অসমীয়া আখৰলৈ পৰিৰ্ত কৰিব পাৰে। কেইটামান ৱেবচাইট যেনে www.ildc.in, www.wazu.jp, www.omnicromlab.com আদিত এই ফন্টসমূহ উপলব্দ্ধ আৰু ইয়াৰ পৰা সেই ফন্টবোৰ বিনামুলীয়াকৈ ডাউনলোড কৰি আপোনাৰ কম্পিউটাৰত সংস্থাপন কৰিব পাৰে। অসমীয়া ফন্টতকৈ বাংলা ফন্টৰ প্ৰাধান্য বহু বেছি,এই ফন্ট সমূহৰ সহায়তো অৱশ্যে অসমীয়া ভাষাটো ভালদৰে দেখা পোৱা যায়।   
আপুনি যদি বিভিন্ন ইন্টাৰনেট ব্ৰাওজাৰ (Browser) যেনে Firefox, Internet Explorer, Google Chrome আদিত অসমীয়া আখৰবোৰ আয়তাকাৰ বাকচ অথবা যথেষ্ট সৰু আকৃতিত দেখিছে তেন্তে কি কৰিব?
·         ইয়াৰ বাবে প্ৰথমে, ওপৰত উল্লেখিত ৱেবচাইটৰ পৰা ফন্টটো ডাউনলোড কৰি লওঁক।
·         এতিয়া ডাউনলোড কৰা ফন্টটো পি(Copy) কৰি আপোনাৰ কম্পিউটাৰত থকা C Drive টো খুলি তাত থকা ফোন্ত ফোল্ডাৰ(Font Folder)  টোত পেষ্ট(Paste) কৰি দিয়ক। (C:\windows\fonts\)
·         এতিয়া অপোনাৰ ব্ৰাওজাৰ টো দুবাৰ মান ৰিফ্ৰেচ(Refresh)অথবা ৰিষ্টাৰ্ট (restart) কৰি দিলেই অসমীয়া আখৰ বোৰ জিলিকি উঠিব।
     অৱশ্যে আজিকালি নতুন উন্নত প্ৰযুক্তিৰ Windows Vista, Windows 7 অদিত পূৰ্বৰে পৰা অসমীয়া ভাষা সংস্থাপিত হৈ থাকে, কোনো ধৰণৰ ফন্ট সংস্থাপন অবিহনেই সুন্দৰকৈ অসমীয়া আখৰ পঢ়িব পাৰি।

ইন্টাৰনেটত অসমীয়া ভাষা লিখিব কেনেদৰে?
     ইউনিকোড প্ৰণালীযুক্ত ফন্টবোৰ ব্যৱহাৰ কৰি কম্পিউটাৰত টাইপ কৰিবলৈ বিশেষ কিছুমান ব্যৱস্থাৰ প্ৰয়োজন হয়। তাৰ বাবে আপোনাৰ কম্পিউটাৰত কিছুমান ছফ্টৱেৰ সংস্থাপিত কৰাৰ প্ৰয়োজন ব।  এনেবোৰ ছফ্টৱেৰৰ ভিতৰত দুটামান অতি জনপ্ৰিয় ছফ্টৱেৰ বৰহ(Baraha) আৰু অভ্ৰ(Avro) এই দুটা প্ৰণালীৰ সহায়ত সহজে আপুনিও অসমীয়া ভাষাত লিখিব পাৰে।

বৰহ (Baraha)
     Baraha Software www.baraha.com দ্বাৰা বিকাশিত বাৰাহা টাপিং সঁজুলী। ইয়াৰ সহায়ত অতি সহজে আপুনি আপোনাৰ কম্পিউটাৰত আৰু ৱেব ব্ৰাওজাৰ বোৰত ইউনিকোড মাধ্যমত অসমীয়া লিখিব পাৰিব। ইয়াৰ বাবে উপৰোক্ত ৱেবচাইটটোৰ পৰা আপুনি প্ৰথমে চফ্টৱেৰ টো ডাউনলোড কৰি আপোনাৰ কম্পিউটাৰত সংস্থাপন কৰি লাগিব।
সংস্থাপনৰ পাছত আপোনাৰ কম্পিউটাৰৰ desktop তিনিটা চিহ্ণ(icon) দেখা পাব, তাৰে এটা baraha pad আনটো baraha direct/barahaIME আৰু তৃতীয়টো baraha .
·         baraha pad টো দুবাৰ ক্লিক্ কৰিলে এটা file খোল খাব, যিটো অন্য সাধাৰণ text file দৰে তলৰ status bar আপুনি দেখা পাব [kannada] বুলি লিখা আছে । 
·         ওপৰৰ tool bar আপুনি language বুলি লিখা দেখা পাব, তাত click কৰি assamese language select কৰক।
·         এতিয়া আপুনি টাইপ কৰিলে অসমীয়া দেখা পাব। 
এই পদ্ধতিটো সকলোতকৈ সহজ পদ্ধতি, নতুনকৈ শিকাৰ বাবে আটাইতকৈ উপযোগ্য।
·         আনটো পদ্ধতি মতে, আপোনাৰ dekstop অন্য এটা baraha direct/barahaIME বুলি icon আছে, baraha direct icon  টো double click কৰিলে আপোনাৰ কম্পিউটাৰৰ system tray এটা সৰু icon দেখা পাব, EN(English) বুলি লিখা আছে, এতিয়া আপুনি  F 11 press কৰিলে EN টো KN(kanada)  হৈ যাব, পুনৰ F 11 press কৰিলে পুনৰ EN  হৈ যায়|
·         এই সৰু icon টোত right click কৰিলে এখন সৰু window ওলাব। ইয়াত language  click কৰিলে এখন sub menu ওলাই আৰু এই sub menu আপুনি assamese language set কৰিব লগিব। তেতিয়া আপুনি KN ঠাইত AS দেখা পাব। (EN= english, KN =kanada, AS= assamese) 
·         এতিয়া আপুনি  F 11 press কৰিলে EN টো AS  হৈ যাব, পুনৰ F 11 press কৰিলে পুনৰ EN  হৈ যাব
·         এতিয়া আপুনি যিকোনো এটা application , উদাহৰণ স্বৰূপে MS word খুলিলৈ টাইপ কৰিব পাৰে। MS word খোলাৰ পাছত F11 press কৰিলে AS দেখা পাব আৰু আপুনি টাইপ কৰিব পাৰে, পুনৰ F11 press কৰিলে EN দেখা পাব, এই EN  অৱস্থাত আপুনি ইংৰাজীত টাইপ কৰিব পাৰে। অসমীয়াত টাইপ কৰিবলৈ ইয়াক পুনৰ AS অৱস্থালৈ (F11 press কৰি)নিব লাগিব।
·         এই পদ্ধতিৰ দ্বাৰা প্ৰায় সকলো এপ্লিকেচনত (application) অসমীয়া লিখিব  পাৰি |

বৰহ সহায় অসমীয়া লিখনৰ কেইটামান উদাহৰণ:
·         নমস্কাৰ কি খবৰ আপোনাৰ ?
namaskaar, ki khabar aaponaar ?

·         ভালেই আছো, আপোনাৰ কেনে কওঁকছোন ?
ma^i bhaalei aaCo, aaponaar kene kao~MkaCon ?

·         মোৰো ভালেই, দুই এদিনতে আপোনাক কৰিম
moro bhaalei, dui edinate aaponaak lag karim .

·         বাৰু ঠিক আছে, আজিলৈ আহো বিদায়
baaru Thik aaCe , aajiloi aaho bidaay.

·         ধন্যবাদ
dhanYabaad

·         চিৰ চেনেহী মোৰ ভাষা জননী
cir cenehI mor bhaaShaa jananI

·         আহক, অসমীয়া ভাষাক ইন্টাৰনেট বিশ্বত প্ৰতিষ্ঠা কৰো
aahak, asamIyaa bhaaShaak inTaaraneT biSbat pratiShThaa karo

·         আমি অসমীয়া নহওঁ দুখীয়া
aami asamIyaa nahao~M dukhIyaa

     অন্যান্য যুক্তাক্ষৰযুক্ত বাক্যৰ বাবে আপুনি বৰহ হেল্প ফাইল(Help File) বিস্তৃত বিৱৰণ পঢ়িব পাৰিব। উল্লেখনীয় যে অসমীয়া কথন পদ্ধতি (Phonetics)ৰ লগত মিলায়েই আপুনি আপোনাৰ কম্পিউটাৰ কী বোৰ্ডৰ (Key Board) কী বোৰৰ সহায়ত অসমীয়া লিখি যাব পাৰে। ওপৰৰ উদাহৰণ বোৰৰ পৰা এই কথা নিশ্চয় ধৰিব পাৰিছে।
     এই কথা খিনি অলপ শুনাত জটিল যেন লাগিব পাৰে কিন্তু আচলতে মুঠে জটিল নহয়। এই পদ্ধতিৰ দ্বাৰা আপুনি প্ৰায় সকলো কম্পিউটাৰৰ সকলো application তথা internet site অসমীয়াত লিখিব পাৰিব। এই পদ্ধতি অতি সুবিধাজনক, কিন্তু অলপ অভ্যাসৰ প্ৰয়োজন , বিশেষকৈ টাইপিঙৰ নিয়মবোৰ জানি লে সুবিধা হয়।

অভ্ৰ(Avro)
     Omicronlab(www.omicronlab.com) দ্বাৰা বিকাশিত এটা জনপ্ৰিয় সঁজুলী। অভ্ৰ মুলত: বাংলা প্ৰধান চফ্টৱেৰ যদিও ইয়াৰ সহায়ত অসমীয়া লিপিও লিখিব পৰা যায়। www.omicronlab.com পৰা অভ্র চফ্টৱেৰ টো ডাউনলোড কৰি কম্পিউটাৰত সংস্থাপন কৰাৰ পাছত কম্পিউটাৰটো এবাৰ ৰিষ্টাৰ্ট(restart) কৰাটো জৰুৰী। তাৰ পাছতে অভ্র চিহ্ন(icon) টোত ক্লিক কৰিলে অভ্র সক্রিয় হৈ ঊঠে। স্ক্রীণৰ তলত থকা চিষ্টেম ত্রে(system tray) ইয়াক দেখা পোৱা যায়। চিষ্টেম ত্রে থকা চিহ্নটোত দুবাৰ ক্লিক্ কৰিলে অভ্রৰ এটা নিজা toolbar সক্রিয় হয়। বাংলা(অসমীয়া)আৰু ইংৰাজী ভাষা দুটা ক্লিক্ কৰি সক্রিয় আৰু নিষ্ক্রিয় কৰাৰ সুবিধা থাকে। সেই toolbar ডালতে virtual key board সক্রিয় কৰাৰো ব্যৱস্থা আছে, যাৰ সহায়ত mouse -ৰে ক্লিক(click) কৰি অসমীয়া আখৰ লিখিব পৰা যায়। অভ্র কীবোৰ্ড সাধাৰণতে দুটা mode সমৰ্থন কৰে বাংলা (যিটোৰে অসমীয়া ভাষাটোও লিখিব পৰা যায়) আৰু আনটো ইংৰাজী। কীবোৰ্ড mode আপুনি কম্পিউটাৰৰ কীবোৰ্ডত থকা F12 বুটাম টো ডবাই বাংলা(অসমীয়া) পৰা ইংৰাজী অথবা ইংৰাজীৰ পৰা অসমীয়ালৈ পৰিবৰ্তন কৰিব পাৰে। F12 সক্রিয় কৰি অৰ্থাৎ বাংলা(অসমীয়া) mode টো সক্রিয় কৰি virtual keyboard অবিহনেও মাত্র কম্পিঊটাৰৰ সাধাৰণ কীবোৰ্ড খনৰ যোগেদিও অসমীয়াত আখৰ লিখিব পৰা যায়। অৱশ্যে ইয়াৰ বাবে কিছু অনুশীলনৰ প্রয়োজন।
      অভ্রৰ মূল অসুবিধাটো অসমীয়া বৰ্ণটোক লৈ। যিহেতু অভ্র মুলতঃ বাংলা প্রধান চফ্টৱেৰ সেইবাবে টোক কেৱল মাত্র virtual keyboard জৰিয়তেহে ক্লিক কৰি লিখিব পাৰি। যিটোৰ বাবে সময়ৰ অলপ অপব্যয় হয়। কিন্তু অভ্যাস গঢ়ি তুলিলে সহজ হৈ পৰে। কিন্তু বাৰাহাত তেনে অসুবিধা নাই অসমীয়া "" আৰু "" বাবে mouse click কৰাৰ কোনো প্ৰয়োজন নাই লগতে  অসমীয়াকে ধৰি প্ৰায় সকলো ভাৰতীয় ভাষা লিখিবৰ বাবে ব্যৱহাৰ কৰিব পাৰি 
     ইয়াৰ উপৰিও মাইক্ৰচ্ফ্টৰ ভাষালিপি, লিপিকাৰ আদি বিভিন্ন প্ৰণালীৰ দ্বাৰাও অসমীয়া ভাষাটো লিখিব পাৰি। আপোনাৰ সুবিধামতে ইয়াৰে যিকোনো এটা প্ৰণালীত অসমীয়া লিখিব পাৰিব। প্ৰতিটো ছফ্টৱেৰতে সহায়ৰ বাবে এটা Help Option থাকে, ইয়াত থকা নিৰ্দেশাৱলীৰ সহায়ত সহজে অসমীয়া লিখিব পৰা যায়। এনেধৰণে আমি যদি অসমীয়া লিখাত অভ্যস্ত হৈ পৰো তেন্তে, দৈনন্দিন জীৱনৰ সৰু সুৰা চিঠি পত্ৰ, -মেইল আদি অসমীয়াতে লিখি আদান প্ৰদান কৰিব পাৰো উদাহৰণস্বৰূপে, আপুনি পঢ়ি থকা এই প্ৰবন্ধটিও ইউনিকোড সহায়তেই কম্পিউটাৰত টাইপ কৰি সাজু কৰা হৈছে
     ইউনিকোড মানদন্ড পৃথিৱীৰ সকলো বৃহৎ বৃহৎ কোম্পানীবোৰে গ্ৰহণ কৰিছে, Apple, HP, IBM, JustSystems, Microsoft, Oracle, SAP, Sun, Sybase, Unisys আদি মূখ্য।|আধুনিক বৈশিষ্ট যুক্ত ব্যৱহাৰৰ কাৰণে যেনে, XML, Java, ECMAScript (JavaScript), LDAP, CORBA 3.0, WML, ইত্যাদি সকলোতে ইউনিকোডৰ প্রয়োজন হয়। বৰ্তমান প্রায় সকলো নতুন প্রযুক্তিৰ কম্পিউটাৰ, ৱেব ব্ৰাজাৰ আদি ইউনিকোড সমৰ্থিত। বিশ্বৰ মুঠ ৱেবচাইটৰ প্ৰায় আধা ভাগ ইউনিকোডলৈ ৰূপান্তৰিত হৈছে। ইউনিকোড যে কেৱল ইন্টাৰনেটত আখৰ দেখাৰ বাবে তেনে নহয়। উদাহৰণ স্বৰূপে আপোনাৰ হাতত থকা মোবাইল ফোনটোত যে আপুনি বাংলা অথবা হিন্দী আদি ভাষাসমূহ দেখা পাইছে সেইটোও ইউনিকোডৰ বাবেহে সম্ভৱ হৈছে। মুঠতে ইউনিকোড অপৰিহাৰ্য্য যদিহে আমি সময়ৰ সমান্তৰাল সেঁতু গঢ়িব খোজো। ইউনিকোড প্ৰণালী বিশ্বৰ প্ৰায় সকলো ভাষাআঁকোৱালি লৈছে,কাৰণ হৈছে সময়ৰ আহ্বান, কোনো ভাষাক চাইবাৰ জগতৰ লগত সাঙুৰিব লাগিলে ইউনিকোডৰ বাহিৰে গত্যন্তৰ নাই
ইন্টাৰনেটত অসমীয়া ভাষাটোৰ বহুল প্ৰচলন লাগে কিয়?
     বৰ্তমান দেখা গৈছে ইন্টাৰনেটত বিভিন্ন আঞ্চলিক ভাষাৰ ৰাজত্ব চলিছে। ইতিমধ্যে ভাৰতত বহুটো বহুজাতিক প্ৰতিষ্ঠানৰ ৱেবচাইটত বিভিন্ন ভাৰতীয় ভাষা সমূহে প্ৰাধান্যতা পাইছে। কিন্তু অসমীয়া ভাষাৰ যেন তো আদৰ নাই। হয়তো বাংলাভাষাৰ লগত অসমীয়া ভাষাৰ সামঞ্জস্য আছে বুলিয়েই অসমীয়া ভাষাটো এলাগী হৈ পৰি আছে। কিন্তু আমি প্ৰতিষ্ঠা কৰিব লাগিব যে অসমীয়া ভাষাটোৰ নিজস্ব এটা পৰিচয় আছে। যাৰ বাবে আমি ইন্টাৰনেটত অসমীয়া ভাষাৰ বহুল প্ৰয়োগ কৰাটোৰ প্ৰয়োজনীয়তা আহি পৰিছে।
     ইতিমধ্যে ইন্টাৰনেটৰ বিভিন্ন ৱেবচাইট, ব্লগ, আদিৰ লগতে চিয়েল নেটৱৰ্কিং চাইট ফেচবুকত অসমীয়া ভাষা ইন্টাৰনেটত প্ৰতিষ্ঠা কৰিবৰ বাবে বিভিন্ন যুগান্তকাৰী পদক্ষেপ হাতত লোৱা হৈছে। কিছুদিনৰ আগতে ফেচবুকত এটা বিপ্লৱৰ সূচনা হৈছিল।  ইন্টাৰনেটত নিজৰ নাম বোৰ এসপ্তাহৰ বাবে ইংৰাজীৰ সলনি অসমীয়াত লিখি প্ৰদৰ্শন কৰিবলৈ আহ্বান জনোৱা হৈছিল। যাৰ ফলাফল আছিল অবিস্মৰণীয়। মুহূৰ্ততে হাজাৰ হাজাৰ ইংৰাজী নাম অসমীয়াত জিলিকি উঠিছিল। ফেচবুক এসপ্তাহৰ বাবে হৈ পৰিছিল সম্পূৰ্ণ অসমীয়া। যেন ইন্টাৰনেটত অসমীয়া লিখনৰ এক অনলাইন কৰ্মশালাহে গঢ় লৈ উঠিছিল। যি সকলে অসমীয়াত লিখিব পৰা নাছিল তেওঁলোকে আনৰ পৰা শিকি লেও যোগদান কৰিছিল এই বিপ্লৱত। নীৰৱে গঢ় লৈ উঠিছিল এক ভাষা আন্দোলন। এতিয়াও বিভিন্ন গোটৰ দ্বাৰা চলি আছে ইন্টাৰনেটত অসমীয়া ভাষা প্ৰতিষ্ঠাৰ এক নীৰৱ আন্দোলন।
     আকৌ যেন আমি সকলোবোৰ ঘূৰি গৈছো নিজৰ পঢ়াশালিলৈ, শিকিবলৈ, কিন্তু এইবাৰ ফলি বহীত নহয়, শিকিছো কম্পিউটাৰ, ইন্টাৰনেটত। আঁহক আমিও ইন্টাৰনেটত অসমীয়া ভাষাটোক প্ৰতিষ্ঠা কৰিবলৈ আগবাঢ়ি যাওঁ। কম্পিউটাৰ স্ক্ৰীণতো জিলিকি উঠক সকলোৰে প্ৰিয় সেই বাক্যশাৰীচিৰ চেনেহী মোৰ ভাষা জননী


ইউনিকোড মাধ্যমত অসমীয়া ভাষাত উপলদ্ধ কেইটামান জনপ্ৰিয় ৱেবচাইট
www.xobdo.org
www.enajori.com
www.xophura.net
www.ntm.org.in (অসমীয়া বিভাগ)
www.ildc.in (অসমীয়া বিভাগ)
www.ehd.org (অসমীয়া বিভাগ)
www.bhashaindia.com (অসমীয়া বিভাগ)

সম্পূৰ্ণ অসমীয়া ভাষাত উপলব্ধ কেইটামান জনপ্রিয় ব্যক্তিগত ব্লগ
আকাশ
www.jamini.co.in
যামিনী অনুৰাগ

প্ৰত্যাশা
www.anjalborah.blogspot.com
অঞ্জল বৰা

জালপঞ্জী
www.bikram98.blogspot.com
বিক্ৰম জিন্দাৰ বৰুৱা

মই আৰু মোৰ পৃথিৱী
www.himjyoti.com
হিমজ্যোতি তালুকদাৰ

স্পন্দন
www.osrukona.blogspot.com
বিশ্বজিৎ নাথ

আমি অসমীয়া
www.amioxomiya.blogspot.com
মনজিৎ নাথ

যি মন যায়
www.mor-anubhav.blogspot.com
. প্ৰবোধ বৰা

অনুভূতিৰ ভৰপক
www.pankajborah.blogspot.com
পংকজ বৰা

বুলজিৎ
www.buljit.blogspot.com
বুলজিৎ বুঢ়াগোহাঁই

যাযাবৰ
www.priyankoo.com/blog
প্ৰিয়াংকু শৰ্মা


বর্ণমালা
www.barnamaala.blogspot.com
পল্লৱ প্রাণ গোস্বামী

মোৰ ভাৱৰ বুৰবুৰণি
www.saitanya.blogspot.com
চৈতন্য ভৰদ্বাজ

শতদল
www.hrishirajsharma.blogspot.com
হৃষীৰাজ শৰ্মা

(সাতসৰী আলোচনীৰ ফেব্রুৱাৰী সংখ্যাত প্রকাশিত)