Thursday, April 28, 2011

এখন কৃত্রিম নদীৰ কথাৰে

এখন নদী। যি সৃষ্টি হোৱা নাছিল, তাক খান্দি সৃষ্টি কৰোৱা হৈছিল। শুনিবলৈ আচৰিত নালাগেনে বাৰু? হয়, যোৰহাট নগৰৰ মাজেৰে বৈ যোৱা এখন সৰু নৈ, ভোগদৈ। বহু লোক হয়তো জ্ঞাত নহয় যে ইয়াক প্ৰকৃততে খান্দিহে সৃষ্টি কৰা হৈছিল। দৌল, পুখুৰী, আদিৰ চমত্কাৰি নিৰ্মানকাৰ্য্যৰে আহোম স্বৰ্গদেউ সকলে যিধৰণেৰে চমক সৃষ্টি কৰিছিল, তাৰে এটা উদাহৰণ হ’ল এই ভোগদৈ নৈ খন। স্বৰ্গদেউ গৌৰীনাথ সিংহই আহোমৰ শেষ ৰাজধানী ৰংপুৰৰ পৰা যোৰহাটলৈ স্থানান্তৰিত কৰিছিল। সেই সময়ত নতুন ৰাজধানী যোৰহাটত প্ৰজাৰ সুবিধাৰ্থে পানী যোগানৰ বাবে এখন নৈৰ প্ৰয়োজনীয়তা বাৰুকৈয়ে অনুভৱ হৈছিল। সেইমতে স্বৰ্গদেউৱে পাত্ৰ মন্ত্ৰী পূৰ্ণানন্দ বুঢ়াগোঁহাইৰ সৈতে আলচ কৰি যোৰহাটত এখন নদী খন্দাৰ সিদ্ধান্ত গ্ৰহন কৰে। কথামতে কাম। ওঠৰশ শতিকাত দিচৈ নৈ খন খান্দি যোৰহাটৰ মাজেৰে বোৱাই ব্ৰহ্মপুত্ৰৰ লগত সংযোগ কৰাৰ আঁচনি লোৱা হয়। নৈ খন্দাৰ প্ৰাকমূহূৰ্তত পূৰ্ণানন্দ বুঢ়াগোঁহায়ে কাম খিনি সুকলমে আগবাঢ়িবলৈ ভগৱানৰ ওচৰত প্ৰাৰ্থনা জনাই ভোগ প্ৰদান কৰে। সেইবাবে সেই নদীখনে নাম পালে ‘ভোগদৈ’। কোনো আধুনিক কাৰিকৰী কৌশল অবিহনে এখন নদী খন্দাৰ দৰে দুৰূহ কাম নিশ্চয় বিস্ময়কৰ। ভোগদৈ নৈ আজিও বৈ আছে। কিন্তু ইমান কষ্টেৰে সৃষ্টি কৰা এখন নৈৰ ভালদৰে সংৰক্ষণ কৰাৰ ক্ষেত্ৰত আমাৰ যেন কৰণীয় একো নাই!

3 comments:

Bikram M Baruah said...

ভাল লাগিল তথ্যটো জানি৷ সংৰক্ষণ কৰাটো অতি প্ৰয়োজন৷
চমত্কাৰী => চমৎকাৰী
কাৰীকৰি => কাৰিকৰী
হ’ব লাগিছিল কিজানি৷

হিমজ্যোতি said...

ধন্যবাদ :) শুদ্ধ কৰি দিয়া হ'ল

Jyotirmoy Saikia (জ্যোতিৰ্ময় শইকীয়া) said...

Very interesting fact. I spent 4 years near Bhogdoi. (I did my B.E. from Jorhat Engineering College). Bhodoi passes just by the side of JEC campus. I was not aware of this fact.