Thursday, January 6, 2011

গুৰুজনাৰ নামত চলি থকা ভণ্ডামিবোৰ

"আমি অসমীয়া নহওঁ দুখীয়া"- এই মন্ত্ৰ ফাঁকি আজিকালিৰ যুগত বাৰু সঁচাকৈয়ে খাপ খাইনে? ঠিকেই আমি সাহিত্য, কলা-সংস্কৃতি আদিৰ ফালৰ পৰা কেতিয়াও দুখীয়া নহয়, কিন্তু তথাপি আমি নিজকে সদায় দুখীয়াৰ শ্ৰেণীতেই ৰাখিম। বিশেষকৈ ধনৰ দুখীয়া নহ'লেও মনৰ দুখীয়া সদায়েই হৈ থাকিম। যি খিনি সময়ত অন্যান্য ভাষা, জাতিৰ লোকে নিজৰ কৃষ্টি সংস্কৃতি আদিবোৰ সগৌৰৱেৰে বিশ্ব দৰবাৰলৈ উলিয়াই নিবলৈ ধৰিছে, সেইখিনি সময়তে আমি নিজৰ মাজতে খোৱা কামোৰা খন কৰি আছো। আজি কেইদিনমানৰ পৰা অসমীয়া বাতৰি কাকত সমূহত এটা আচহুৱা বিতৰ্ক চলি থকা দেখা পাইছো। শ্ৰীমন্ত শংকৰদেৱ বিৰচিত 'কীৰ্তন ঘোষা' পুথি খন হেনো সম্পাদনা কৰা হৈছে, বেলেগ ধৰণে। চকু কপালত উঠা কথা নহয়নে? আমি নিজকে গুৰুজনাতকৈও ইমান পণ্ডিত বুলি ভাবোনে? ইয়াকে লৈ দুটা ফৈদৰ মাজত টনা আজোৰা! অতি নিৰ্লজ্জ কাৰবাৰ। আমি কেতিয়াবা এইটো ভাবি চাইছোনে যে গুৰুজনাৰ অমৰ কীৰ্তি সমূহ বিশ্ব বাসীৰ আগত উলিয়াই দিবলৈ এতিয়াও বহু কাম বাকী। এতিয়াও শংকৰদেৱ বুলি ক'লে অসমৰ বাহিৰত মানুহে মুখ মেলি থাকে, 'শংকৰদেৱ কোন বুলি?' তেখেতৰ বিষয়ে অসমৰ বাহিৰত প্ৰচাৰৰ বাবে আমি কিমান কাম কৰিছো? মহাপুৰুষ শ্ৰীমন্ত শংকৰদেৱ মাথোঁ এজন ধৰ্ম প্ৰচাৰকেই নহয়, অসমৰ এটি জাতীয় অনুষ্ঠান সদৃশ নাম। তেনেক্ষেত্ৰত তেখেতৰ নামত এনে ধৰণৰ বিতৰ্ক সৃষ্টিৰ কাৰণেই বা ক'ত? দুই-তিনিঘৰ আঁতৰে আঁতৰে একো একোটা নামঘৰ স্থাপন কৰি আবেলি আবেলি নাম কীৰ্তন কৰাতেই আমাৰ শ্ৰদ্ধা ভক্তি বোৰ সীমিত হৈ আছে। তাতো আকৌ বিভিন্ন সামাজিক ভাগ বতৰা, গুৰুজনাৰ নামত! বিভিন্ন ফৈদৰ মাজত অহি নকুল সম্পৰ্ক। এনেকৈয়ে আমি ভক্তি ৰসত ডুবি আছো, তাতকৈ বেছি একো কৰিব পৰা নাই আৰু হয়তো এনেকৈয়ে থাকিব সদায়। শংকৰদেৱৰ নামত সৰু বৰ কিমান যে সংগঠন আছে! ইয়াৰে বহুতো হয়তো 'ধনী' সংগঠন, কিন্তু জানিবলৈ মন যায়, গুৰুজনাক অসমৰ বাহিৰত প্ৰতিষ্ঠা কৰিবলৈ এখেত সকলে কি কৰি আছে প্ৰকৃততে, অসমত গুৰুজনাক লৈ খোৱা কামোৰা কৰি থকাৰ বাহিৰে? আমাৰো এটা সপোন আছে, অসমৰ বাহিৰত গুৰুজনাৰ নাম উচ্চাৰণ কৰিলেই যেন এজন অনা-অসমীয়া ব্যক্তিৰ শ্ৰদ্ধাত মূৰ দোঁ খাই যায়। কিন্তু এতিয়া দেখিছো সেই দিন সুদূৰ পৰাহত! 

(১৩.০১.১১ 'আমাৰ অসম' কাকতৰ 'সম্পাদকলৈ চিঠি' শিতানত প্রকাশিত)

3 comments:

auditya dutta said...

xundor....kintu xeixokol pondite ei lekhakhini porhiboloi pabo lagisil...

Devajit said...

bor homoiupojugi lekha hoise....

anjali said...

লিখনী ভাল হৈছে ।এই বিষয়টো কিবা লাজৰ বাজ হৈছেগৈ আৰু ।