Friday, September 24, 2010

প্রসংগ : অযোধ্যা

বৰ্তমান সময়ত দেশত যি দুটা বিষয় আলোচনা বিষয়বস্তু হৈ আছে, সেই দুটাই হ’ল কমনৱেলথ গেমচ আৰু অযোধ্যাৰ ভূমি বিবাদৰ বহু প্রতীক্ষিত ৰায়দান। এটায়ে ইতিমধ্যে সমগ্র বিশ্বৰ সন্মুখতে লজ্জাত দেশৰ মুখ উলিয়াব নোৱাৰা অৱস্থা কৰি তুলিছে। আনটো বিষয়ে ইতিমধ্যে দেশত এক চেপা উত্তেজনাৰ বিৰাজ কৰাইছে। ৰাজনৈতিক দলসমূহে ইয়াৰ পূৰ্ণসুযোগ গ্রহন কৰিবলৈ ইতিমধ্যে উঠিপৰি লাগিছে। এটা কথা বুজাত অসুবিধা হৈছে, অযোধ্যা ৰায়দান বিষয়টোক চৰকাৰ অথবা দল সংগঠনে ইমান বা দিছে কেলেই? ইমান বছৰৰ পাছত এটা ৰায়দান ওলাব, তাৰ বাবে দেশত এক জৰুৰীকালীন পৰিস্থিতিৰ দৰে পৰিৱেশ সৃষ্টি কৰোৱা হৈছে কিয়? এচ এম এচ, এম এম এচ আদিবোৰ বন্ধ কৰি দিয়া হৈছে, জিলাই জিলাই আৰক্ষীক সতৰ্ক কৰি দিয়া হৈছে। ঠিকেই আছে, সতৰ্ক হৈ থকাটো জৰুৰী। কাৰণ ফিৰিঙতিৰ পৰা খাণ্ডৱ দাহ হবলৈ বেছি পৰ নালাগে। কিন্তু এই ব্যৱস্থা বোৰ ইমানকৈ প্রচাৰ কৰা হৈছে কিয়? খোদ গৃহমন্ত্রীয়ে সাংবাদিক মেল পাতি এই বাতৰি বোৰ দিছে। কিন্তু কি যুক্তিত? ইয়াৰ জৰিয়তে সাধাৰণ ৰাইজৰ মাজত এটা আতংময় পৰিবেশৰ সৃষ্টি হোৱা নাইনে? এইবোৰ ব্যৱস্থা দেশৰ আভ্যন্তৰীন সুৰক্ষাৰ স্বাৰ্থত নিশ্চয় গোপনেও লব পৰা যায়। ৰায়দানৰ পাছতে যে কিছুমান ৰাজনৈতিক অ-ৰাজনৈতিক সংগঠনৰ তথাকথিত ভণ্ড কিছুমান নেতা পালিনেতাই যে অবাঞ্চিত মন্তব্য দি একুৰা জুই জ্বলাবলৈ প্রস্তুতি চলাইছে সেয়াও নুই কৰিব নোৱাৰি। কংগ্রেছ আৰু ইয়াৰ সমভাবাপন্ন দলসমূহৰ মুছলমান প্রীতি আৰু বিজেপি আৰু ইয়াৰ লগৰীয়া সকলৰ হিন্দু প্রীতিয়ে যে দেশৰ কিমান ক্ষতি কৰিছে সেয়া সকলোৱে ভালদৰে হৃদয়ঙ্গম কৰিব পাৰে। গোটেই বিষয়টো যিহেতু আইনৰ মেৰপাকতে আবদ্ধ হৈ আছে, তেন্তে আইনে যি কয় সেয়া মানি লবলৈ একপ্রকাৰ সকলো বাধ্য। কিন্তু এই স্পৰ্শকাতৰ বিষয়টো সংবাদ মাধ্যম আৰু চৰকাৰে এনেদৰে প্রচাৰ কৰি আছে যে, সমগ্র দেশবাসীৰ মনত এক প্রকাৰ ১৯৯২ ৰ বিভীষিকাময় পৰিবেশৰ দৃশ্যবোৰেই যেন চানি ধৰিছে। সংবাদ মাধ্যম আৰু চৰকাৰেও গোটেই বিষয়টোৰ ব্যাপক প্রচাৰ বন্ধ কৰাটো দৰকাৰী হৈ পৰিছে।

No comments: